Kjole med glade fuglar

Denne blei sydd til eit bursdagsbarn i eldstejentas klasse. Eige mønster. Eg kan ikkje heilt hugse kva eg kjøpte dette stoffet, var nok på ein Danmarksferie. Kanskje kan det ha vore i Videbæk, der det var ein fin stoffbutikk.

Raud “Maud-kjole”

Hei, hei, nå er det jammen lenge sidan eg har blogga, over 1,5 år! Eg har syrom ennå, en brukar det på langt nær så mykje (til saum) som før. Men litt blir det innimellom. Nå fekk eg eit innfall om å leggje ut nokre bilete, medan resten av familien sit og ser Star Wars…

Denne kjolen har vi hatt mykje glede av, den er sydd i eit retro-stoff designa av Maud Fredin-Fredholm, kjøpt på Stoff og Stil for nokre år sidan. Det er eit tykt jerseystoff med veldig fint fall, eg veit ikkje kva det heiter eller korleis ein får tak i liknande stoff. Nederst er den kanta med vanleg skråband (vevd stoff-skråband). Mønsteret er sjølvteikna.

Så får eg sjå korleis det går å blogge med Windows Open Live Writer, om eg får publisert… Det var vanskeleg å få biletet i rett storleik, men blei ikkje aller verst til slutt. (ca str. 134)

Ei blomstereng av ein 17. mai-kjole (Mange bilete)

Minstejenta fekk ny kjole til 17.mai. Eg fekk lyst til å sy noko av dette stoffet eg kjøpte på stoffbutikken i Videbæk på Danmarksturen i fjor, og eg er veldig godt fornøgd med resultatet.

Bak:

Rynking på skukldrane, ikkje godt synleg:

Nederst:
Underskjørtet er kanta med rullefald på overlocken.

In action:

Fleire jentekjolar

Samme mønster som drageryttarkjolen for nokre innlegg sidan.

Ny kjolemodell-favoritt

Kjolemønsteret er basert på eit grunnmønster i boka til Inger Öberg. Skjørtet er sydd av eitt lag ullfrotté og livet er av to lag singeljersey. I praksis bomullsjersey, sidan det var Drageryttar-stoffet jenta ville ha. Livet er vrangsydd utanom i ermeopningane. Rekkjefylgje i vrangsyinga: 1. Sidesaumar i skjørt. Sidesaumar og skuldersaumar ytterliv og fôr til liv. 2. Sydde dei to liva på kvar side av skjørtet, slik at saummonnen blir usynleg. 3. Halsribb vrangsydd via den eine ermeopninga. 4. Sydde ermeribbane på til slutt utan å vrangsy. Tips til vrangsying her, men i det steget der ein brettar til ytterstoff og fôr mellom fingrane, må ein også ha med ribben.

Julekjole 2015: Med utgangspunkt i t-skjortemønster

Slik var mine kjære små kledd sist jol. Det var ikkje eldstemann sin tur til å få nye klede i år, som ein kan sjå på bukselengda. Derimot fekk jentene nye kjolar.

Minstejenta har fått ein enkel A-form-kjole som eg sette krage på og utvida ermane i retning “bishop sleeve”*.

Mellomstejenta i raud kjole har fått ein litt meir eksperimentell kjole. Etter å ha tenkt litt og laga ei skisse, fann eg fram eit mønster eg kunne “klippe og lime” i. Mønsteret blei endra omtrent som skissene viser øverst i innlegget. Velour blei i tykkaste laget for rynking, men eg har likevel forklart litt nedanfor korleis eg har laga kjolen fordi grunnprinsippa kan overførast på andre typer stoff og plagg.

For spesielt interesserte:

*Bishop sleeve vil seie at ermane er vidare jo lenger ned du kjem, og posete nedst. Øverst syr ein i ermet i ermeholet som vanleg utan noko rynking. I motsetnad til puffermar, som er fyldige øverst. Eg likar godt bishop sleeves, dvs, heller “bishop sleeve light”. Blir dei for vide nedst, blir det fort upraktisk. Her er ein tidlegare post der eg har eit bilete av korleis mønsterdelen til eit slikt erme ser ut. Og eit vaksenplagg med den type ermar ser du bilete av her.

“Making of”, den raude kjolen:
-Mønster –utgangspunkt: T-skjortemønster i boka “Mönster och konstruktioner för barnkläder” av Inger Öberg.
-Finne storleik: Eg tok utgangspunkt i dottera mi si overvidde, og la til ønska ledigheitsvidde (dvs forskjellen på barnets omkrins og plaggets omkrins). Eg hugsar dessverre ikkje kva for ledigheitsvidde eg brukte, men vil tippe det var ca 6 cm.
-Mønsterendringar: Smalna inn i livet slik at ledigheitsvidda var den samme rundt brystet og i livet. Livet på kjolen trur eg at eg la litt høgare enn jentas midje. Trakk frå litt nederst på bakstykket og la til litt på framstykket (men utan å endre lengda i sidene)
-Halsopning: V-hals med eit stivt belegg. Knepping med KAM-knappar ned til livet bak.
-Delt liv: Båd for enkel avslutning på knappestolpen, og for at eg kunne ha ein god del meir vidde i skjørtet enn i livet (i motsetnad til den lilla kjolen, som skrår jevnt ut, og dermed relativt liten forskjell i vidde oppe og nede). NB: Om ein syr i fast/stumt stoff, må ein la kneppinga eller glidelåsen gå lengre ned enn til livet, elles vil ein ikkje få kjolen forbi enten skuldrane eller hoftene.
-Ermane: Ikkje høgt prioritert, korte ermar er lettvint å sy.
-Rynker/drapering: Omtrent som på figuren øverst. Ved sying, rynka eg fyrst saman kvar haldel i øvre del av livstykket, sydde dei deretter mot kvarandre, forsterka saumen med eit tynt band.
-Mønster til skjørt, grunnprinsipp: lage rektangel med horisontal side lik nedre kanten på livstykka (eitt om gongen) og vertikal lengde lik skjørtelengde. Klippe arket vertikalt så ein får 4-5 søyler, spre dei ut i vifteform slik at dei akkurat rører kvarandre øverst. Teikne skjørtemønster utifrå forma ein då får. 

Stjerner på rosa bakgrunn

Fargane på denne kjolen er gjengitt heilt feil… Betre på sjølve kjolen som ei jente fekk til bursdagen sin.

Kattar på lilla bakgrunn

Til eit bursdagsbarn…

Stoffet er kjøpt av Olivias, det sammen gjeldstoffet i berestykket. Begge deler jersey.

Oppgåve: “Kjole av desse seks stoffa!”

Det var tid for å sy ein kjole att, og denne gongen hadde eg lyst til å gjere litt ut av den! Eg blei kjempefornøgd, juhuuu! Mellomstejenta, som nå er 6 år, var med og tok ut stoff. Det eine etter det andre, og til saman blei det seks stykk. Utanom den lilla ribben til kanting. Moro med mange stoff i eit plagg :-)

Fyrste stoffet er grunnstoffet i kjolen; turkis isoli. Vidare er tre jersey-stoff brukt i ein slags “lommestolpe” med tre lommer nedover. Dei to siste stoffa er sydd på som lappar applikert på kjolen; øverst med knappar på og på ryggen. Knappane er det minstejenta på 3 1/2 år som har kosa seg med å plukke ut til storesyster. Eg hadde lyst til å teste ut å legge inn ein tittekant av jersey i kantebandet ved sying med kantebandsapparatet. Det blei enkelte hoppesting, men resultatet elles blei veldig fint! Då eg hadde kanta halsutringing og ermeutringingar, fekk eg lyst til å ha tittekantar i sidene også. Det er ikkje noko snor inni tittekantane, berre ein strimmel tynn, veldig tøyeleg bomullsjersey bretta dobbelt. Tittekantane går ikkje heilt opp og heilt ned, eg syntest det blei ryddigare å avslutte dei eit par cm frå endane av saumane.

Sånn, og så var det snart vinterferie :-)

Designa av minstejenta på 3 1/2

Her om dagen var minstejenta på 3 1/2 år i sitt fyrste bursdagsselskap i barnehagesamanheng. Det verkar som om ho var medviten om at heimesydde plagg er vanleg å ha med seg når barna i dette huset skal i bursdagsselskap, og ho ville gjerne vere med på å lage kjole. Ho plukka ut stoff etter sjølv å ha gjort eit utval av ulike (rosa) stoff ho trudde mottakaren ville like. Og ho bestemte vidare at det skulle vere sjokoladekake på kjolen. Og  ho fekk ikkje nok av berre å velge og ønskje seg, ho var også med då eg klipte kjolen og teikna og klipte kaka,  noko som tok litt tid. Eg blei igrunn ganske overraska over iveren og tolmodet til den vesle jenta., det å lage kjole var jammen stas for henne!

Kjole frå “Barn igjen”

For nokre år sidan var det veldig populært å sy kjolar frå boka “Barn igjen”, kjolane blei også gjerne kalla “Singoallakjkolar”. Eg sydde ein kjole i jersey i str. 122 til jenta vår på 6 år. Synest den blei litt for “telt-aktig”, men er usikker på kva som spela mest inn årsaksmessig til dette. Den ville nok blitt finare med smalare ermar, det går jo an å ha det litt trongare når ein syr i jersey. Og om den var sydd i vikosejersey ville den nok falle finare. Neste kjole blir i eit anna snitt.

Blomst til ei klassevenninne på 6 år

Denne blei gitt vekk i bursdagsgåve for ikkje så veldig lenge sidan! Designen er eit samarbeidsprosjekt mellom mor og dotter, i praksis eit kompromiss mellom tilgjengeleg stoff/vinyl og design-ønskja til jenta mi. Det er moro at barna engasjerer seg i designen! Her hadde jenta mi, i tillegg fargeønskje for kjolen, ønskje om at dekoren skulle vere ein blomst og forbokstaven til bursdagsbarnet.

Mønster: Eige, str. 6 år
Stoff: Isoli, Jydsk stoflager. Ribb frå Stoff og Stil. Flocked heat transfer fr å Silhouette.

Når dei små frøknane skal i bryllaup…

…ryddar mor tid til å sy kjolar. For det er så gøy å sy noko riktig søtt innimellom, når det elles går i velurbukser og college-genserar!

Design og møsnter: Eige
Stoff og tilbehør: Var på salg på Panduro og fekk begge stoff og smykke til ein billig penge… Cowboy-trykknappane er faktisk også kjøpt på slag på Panduro, men det var for fem år sidan.

Og til slutt må eg vise fram det flotte brureparet, her er Andreas, min bror, og hans Nina :-)

Klassevenninne 7 år

Eldstemann fekk med seg denne kjolen då han skulle i bursdag til ei i klassa her for litt sidan :-)

Mønster: Heilt Spesiell og Jubel

Stoff: Stripete Campan frå Hilco/Sydilla.no. Blomstrete rosa jersey frå Ixat og einsfarga rosa jersey frå Stoff og Stil. Alle stoffa kjøpt for fleire år sidan. Gul ribb frå Hilco/Sydilla. PS: Ixat har butikk ennå, og sikkert mange spennande stoff nå også (har ikkje vore i nettbutikken på ei god stund). Den jerseyen eg har kjøpt frå asia har vore av ein annan kvalitet enn den europeisk-kjøpte; den asiatiske er tynnare og med mindre stretch og elastikk. Kan vere greitt å ha i mente om ein har lyst til å bestille frå Asia.

Ein HS&J-kjole til :-)

Niesa vår fylte 6 år nettopp, og etter å ha sydd ein kjole frå Heilt Spesiell og jubel-boka, og syntest møsnteret var flott, blei det ein kjole til!

Stoff: Kattejersey frå Stoff og Stil. Den raud-rosa ribben er også derifrå (eldre type, den nye typen har eg ikkje prøvd ennå). Det lilla stoffet i berestykket er bomull/bambus-interlock frå Strømming Design. Ribben nederst trur eg er kjøpt hjå Jydsk Stoflager.

Glede seg til sommaren med å sy

Femåringen har gått gjennom stofflageret og plukka ut stoff ho likar. Så når eg skal sy noko til henne nå, går eg fyrst til favoritt-bunken og ser kva eg finn der. Og der fann eg dette breistripete stoffet, og leita deretter fram ein liten rest av det tilhøyrande smalstripete. Eg synest kjolen blei kjempestilig, så står det att å sjå om den fell i smak hjå jentungen (fyrste respons var ikkje overveldande positiv… Men det kan jo endre seg ;-)

Mønster: Frå boka til Heilt Spesiell og Jubel. Str. 116.
Stoff: Singeljersey, kjøpt hjå Marthas frisør- og idéstue i Lyngdal.

Kjolen er kanta med samme jerseyen ved bruk av kantebandsapparat på Coverproen. Det går, men eg må fylgje kjempegodt med på remsa, for den vrir seg veldig raskt i apparatet. Ved kanting av dei konvekse kurvene på lommene drog eg litt i lommestoffet for at stoffet ikkje skulle snurpe seg (vanskeleg å unngå snurping heilt).

Romantisk versjon av “Barn igjen-kjolen”

Boka “Barn igjen” kom på salg, og eg kjøpte den for å sy av “Singoallakjole”-mønsteret var ein slager i symiljøet for nokre år sidan. Dette er ikkje testkjolen, den fyrste kjolen har eg visst gløymt å take bilete av. Kjem kanskje etterkvart…

Kjolen er heil-fôra. Kappa nedst er lagt på i lengda i høve til opprinneleg kjolelengde, eg fekk inntrykk av at kjolen var litt kort. Kva for erfaring har de andre med lengda på mønsteret? (Kjolen er sydd i str. 116).

Stoff: Ytterstoff var restestoff kjøpt i ein tysk nettbutikk for fleire år sidan. Kappa og ermane er av Tilda-Stoff frå Panduro. Fôret er tynn bomull frå Midha Enterprice Oslo. Mellomverk kjøpt på ein butikk i Fargerike-kjeden.

Kjole med krage versjon II

Den turkise kragen i forrige innlegg blei veldig stilig  når kjolen ligg flatt, men gjorde litt mindre av seg når kjolen kjem på. Så eg fekk lyst til å lage ein kjole til, med ein større krage. Her er den!

I tillegg til at denne kragen er større, er den asymmetrisk. Men noko eigentleg overlapp er det ikkje, den er sydd som ein ring. Og med biseband. Eg tenkte at denne gongen skulle eg ikkje ha turkise detaljar. Kikka gjennom stoffhylla etter eit stoff til bisebanda, og jammen stoppa ikkje augene mine ved eit (delvis) turkis stoff, nemleg froskejerseyen frå Znok! Eg klipte ei 3 cm brei remse, og inni er det anorakksnor. Ermeutringingane er kanta på samme måte som sist, men denne gongen har eg kutta av 0,5 cm frå utgangspunktet meint for kantebandsapparat. Så med 1 cm i saummonn trekkast altså frå tilsaman 1,5 cm. Så har eg klipt ei 5 cm brei remse og sydd på til ein 1,5 cm brei kant. Stoffet er veldig elastisk til å vere så tykt, så det taklar å bli brukt til ein så brei kant, men så mykje breiare kant kan ein nok ikkje ha ved å bruke dette stoffet.

Og denne gongen trur eg kragen vil gjere seg betre på ein person enn når den ligg flatt ;-)

Mønster: Eige
Stoff: Ull frå Janus, bomullsjersey frå Znok

Crazy about collars? It was so much fun making the collar for the turquoise dress the other day (last post), that I made one more dress with a modified version of the first collar! It looks like an overlap, but it’s not, its made as a closed ring. Like a snake biting its tail.

Kjolen som blei akkurat som den skulle!

Kjole str. 6 år: Den skulle ha krage, og eg har bruka ganske så lang tid på å spekulere ut korleis eg skulle teikne mønsteret til kragen, sidan eg ikkje kunne finne slik krage i nokon av mønsterbøkene mine. Og så blei det akkurat slik eg ønskte meg, juhuuuu! Litt sånn 60-talls feeling? (eller er det 50-tall? Er ikkje kjempestø på motehistorikken :-)

Kjolen er sydd av tykk, deileg  og stretchy krinkelull med glittertrådar i. Frå Janus. Når eg ser på den, får eg litt assosiasjonar til supersyntetisk vintage-stoff, og så gjev det ei veldig god kjensle å tenkje på at dette er EKTE ULL, mjuk og god!

 

Eit full fart-foto, med litt av rotet litt krampeaktig rydda opp i Photoshop i etterkant (små barn, seize the moment):

Ganske tilfeldig, har minstejenta på seg den redesigna kjolen ho har arva etter storesyster. Desse kjolane liknar nokså mykje på kvarandre (den ljosebrune ullkjolen kan du lese om her). Kragen eg sydde i dag er fôra, medan den gamle kjolen er sydd av ein høghalsa damegenser, der kragen er rulla utover og sydd på for hand i nedre kant. Men sluttresultatet liknar. Og ermekantinga er veldig lik.

Mønster, turkis kjole: Eige (samme mønster som “alle” A-form-kjolane som det står eige mønster på, men nå altså med krage i tillegg). Vanlegvis kantar eg eg ermeutringinga med ribb, og klipper ingen saummonn her. Eg har heller ikkje lagt til saummonn denne gongen, men latt den ytterste cm’en vere saummonn samtidig som ferdig kant er 1 cm. Når eg klipper ei 4 cm brei remse til kanting, brettar på langs vrange mot vrange og syr på med éin cm saummonn, går alt opp i opp.

Materiale: Krinkelull frå Janus. Og berre det. Ikkje ofte eg berre brukar eitt stoff!! Og ja, så har eg forresten brukt ein liten bit vinyl transfer som storleiksmerke (eigentleg fyrst og fremst markør for kva som er bak på kjolen).

I spend quite a lot of time  thinking over how to draw a collar that is not split at the front, and is somwhere in the middle between a polo neck and a Peter Pan collar. Something with volume. And I made this dress, and am very happy about the result! It is made of a wonderful, stretchy wool fabric from Janus.