Lue-testing

For ei vekes tid sidan var det lue-dagar her i huset, med utprøving av ulike måtar å sy luer på. Her har barna fått kvar si, med ulik saum-måte.

Den aller fyrste som blei sydd, er den gule med rosa ribb-kant til høgre på biletet. Treåringen fekk velge stoff, og ho plukka straks ut den gule interlocken av bambus. Mjuk og god, men strekkjer seg lett, så eg ville ha ribb-kant på den. Blant åtte-ti fargar eg hadde plukka ut, fann ho raskt ut at det var denne rosa ho ville ha :-). Fôr i samme stoff som ytterstoffet. Lueomkrins 85% av hovudomkrinsen, ribben (3 cm brei) litt under 80%. Dette fungerer, men lua kunne godt ha vore bittelitt vidare.

Eg sydde etterpå ei lue i stivare interlock etter samme fasongen øvst (men utan ribb), den blei meir kantete. Så forskjellig stoff gir luer med ulike uttrykk…

Neste lue ut, var apekatt-lua. Fire like store delar øvst på mønsteret. Sydd i mjuk jersey. Breidde 90% av hovudomkrinsen, passa veldig greitt.

Målet mitt var i utganspunktet å sy ei lue som var godt forma etter hovudet, så den tredje lua, til minstejenta, fekk seksdelt topp. Fôr i samme stoff som ytterstoffet. Jerseyen var ikkje så kjempetøyeleg, så lua fekk omkrins 93% av hovudomkrinsen. Ribben blei lagt til for at ho ikkje så lett skal kunne dra lua av. Ribb 2 cm brei, i overkant av 90% av hovudomkrins. Denne lua passar heilt perfekt, og er den største lue-suksessen så langt!

Mønster: Eigne
Stoff: Gul bambusinterlock frå Strömming Design, innbillar eg meg, ribb frå Stoff og Stil. Ape-jersey frå Stoff og Stil. Løvejersey frå Textart.no, ribb frå Stoff og Stil.