24.11.2014

Symessa 2014!

Då er årets symesse på Norges varemesse på Lillestrøm over for i år. Eg kosa meg tre timar på fredag og mange timar på laurdag, fyrst og fremst fordi eg fekk møte masse hyggelege menneske! Folk eg har møtt tidlegare, folk eg har kjent på nett men ikkje møtt face to face før nå, og folk eg møtte for fyrste gong. Kjempemoro! Tusen takk til alle som tok kontakt, og takk for tilbakemeldingar om at bloggen min kjem til nytte :-)

Som i fjor har eg knipsa på slutten av dagen, når dei fleste har gått heim. Så det har vore mykje meir folk her enn dette. I år var det eit kjempestort utval av trykte jerseystoff å få kjøpt, og det var litt meir tilbod enn i fjor, trur eg.

Og så var det sykonkurranse mellom seks av dei i alt åtte deltakarane i NRKs “Det store symesterskapet” som går på NRK1 på onsdagane framover. Oppgåva var å redesigne ein grå joggegenser frå H&M. Sidan eg  går i samme syforening som Anne og Solveig, var det ekstra moro og stas å heie og fylgje med!

Anne (http://www.topstitched.net/) Solveig (http://houseofhopen.blogspot.no/)

Sjølv om innspelinga er ferdig og resultatet eigentleg er klart (men ukjent for oss sjåarar), må eg berre seie heia, heia! til dykk i Det store symesterskapet, håpar at det er ein av dykk to som vinn! Eg er stolt av dykk, Anne og Solveig!

Her er eit bilete av Symesterskap-gjengen etter at dei har sydd og redesigna:

 

Til slutt: For min del slutta symessa på ein fantastisk måte i år; Ein Babylock Imagine blei med meg heim! Endeleg, eg som skulle kjøpe den på symessa i fjor, men då hadde dei den ikkje på lager då eg var der. Denne gongen skulle eg eigentleg ikkje ha maskin, sidan eg reiste kollektivt. Fredag ettermiddag var dei utselte. Men selgaren henta ei maskin til laurdag, i tilfelle eg skulle ville ha maskin likevel. Og JA! Vidunderlege lykke og glede, maskina blei mi!! (Og takk til dei i syforeninga som kom på den geniale idéen om å ha med seg trillekoffert på symessa, så fekk eg den med meg heim :-)

(Om du har lyst til å sjå bilete frå messa i fjor, er det å finne HER!)

23.11.2014

Teikning i Silhouette Studio: Kran

Intro 1 : Då eg var barn, elska eg å teikne hestar, og av og til teikna eg dei ved å lage masse sirklar og ellipser oppå kvarandre og bygde hesten opp steg for steg. Blei magen litt tynn, var det berre å teikne endå ein sirkel oppå magen, men slik at  magen blei litt utvida. Litt det samme prinsippet ligg bak dette innlegget.

Intro 2: For nokre veker sidan kjøpte eg Silhouette Portrait, veslebror-modellen til Silhouette Cameo. På symessa på Lillestrøm i helga blei eg inspirert til å lære meg å teikne litt i programmet. Så nå har eg sett gjennom ein haug med videoar på Youtube med presentasjon av dei ulike funksjonane i Silhouette Studio-programmet. Som øvingsprosjekt har eg laga ei t-skjorte til mannen min, med ei kran av typen han er med på å lage.

Eg treng ikkje trøytte folk ut med å fortelje alt eg gjorde som ikkje funka så bra, så her er den redigerte versjonen ;-)

Eg fann eit bilete på nettet av den krana eg ville teikna av. Ein moglegheit som er mykje brukt, er å trace biletet; få programmet sjølv til å lage linjer rundt objektet. Kanskje eg lærer meg dette seinare, men nå skulle eg lære meg teikning.

Ikkje bry deg om dei svarte pilene. Dette er eit bilete frå slutten av prosessen. På eit motiv av denne typen, med mange rette linjer er det greitt å bruke polygon-verktøyet (tversoversløyfa som er aktiv på biletet over), dessutan teikna eg sirklar; når ein held inne shift-knappen medan ein teiknar, får ein sirkel i staden for ellipse. Nokon stader er det bua overgangar mellom dei rette linjene, då har eg brukt curve shape/”8-talet” nedanfor polygonverktøyet.

Korleis har eg å gått fram med desse verktøya? Eg teikna oppå biletet. Prinsippet er å lage strekteikningar som ikkje har nokon blindt-endande strekar, det er derfor eg teikna med polygon-verktøyet og ikkje linje-verktøyet. Når ein har to (eller mange) slutta figurar som overlappar kvarande, kan ein “smi” dei saman: Modify-vindauget oppe til høgre > weld. Så teikna eg ein ny del av krana, overlappande med den fyrste delen, smidde saman igjen, gjentok dette til krana voks større og større.

Til slutt teikna eg fisken på frihand, denne teikna eg “ferdig” før eg smidde delane saman. Her har eg berre brukt Curve shape-verktøyet. Ved hjelp av “edit points” (nest øverste verktøy til venstre) flytta eg strekane litt og finjusterte fisken til eg var fornøgd, før eg smidde den saman. Når ein er i select-modus (pila øverst til venstre) kan ein gå over til “edit points” ved å dobbeltklikke på figuren. Fiskesnøret er forresten laga med firkant-verktøy.

Dei svarte pilene er klippelinjer/”klipperamme” for at det skal bli litt lettare å dra av overskytande vinyl. Om ein googlar “weeding lines” finn ein tutorialar på korleis ein kan gjere Silhouette-livet enklare for seg når ein skal fjerne vinylen rundt motivet. Men det er vel fyrst og fremst når ein jobbar med klistremerkevinyl at det er spesielt nyttig.

Merke både bilete og ramme: Select-pil og klikke og dra over begge (evt. klikke på begge medan shift-knappen er inne). Feste dei saman til eitt bilete: “Make” under modify-menyen. Deretter endre storleik på både biletet og klipperamma. Og ikkje minst, til slutt, når motivet skal strykast på: SPEGELVENDE MOTIVET; Object-meny øverst > Miror > Flip horisontally. (Flytt biletet dit du vil ha det på arket.)

Kutte ein til ved sida, etterpå: Eg klipte fyrst ut i øvre, høgre hjørne. Sidan Portrait har variabel breidde mellom hjula som matar inn arket i maskina, vil eg få problem med å bruke opp den biten som er igjen til venstre for motivet. Så eg fann ut at eg like gjerne skulle kutte ut motivet ein gong til. Replicate-meny (blomsteraktig ikon oppe til høgre) > Duplicate left . Sidan biletet til høgre allereie er kutta ut, vil eg ikkje kutte dette ut ein gong til på samme plass. Om eg ikkje vil slette det, kan eg merke det og gå på Silhouette-menyen (øvst til venstre) > Cut settings (Ctrl+F2) > “No cut” (i menyen på høgre side).

Sånn. Eg har lett for å gløyme data-ting om det er lenge mellom kvar gong eg gjer tinga. Så når eg skriv ned kan eg slå opp i bloggen når eg treng ei oppfrisking. Kanskje kan det kome til nytte for andre også?

Materiale: Vinylen er dessverre dårleg vinyl frå Asia, sidan vinylen eg kjøpte hjå Sydilla på symessa ligg på lager hjå broren min (sånn går det når ein handlar for mykje på symessa til å få med seg alt heim på ein gong ;-) T-skjorta er sydd av bomullsjersey. Mønster frå Ottobre.

OG: Om du ser eg har gjort ting på ein tungvinn måte, er du velkommen til å komme med tips til måtar å gjere det betre på!

13.11.2014

Solhattar i november

Eg fekk så lyst til å sy solhatt, eg, og sette i gang. “Du syr solhatt, ja. Ja det passar jo fint nå i november!” sa dei andre på syforeininga sist, med glimt i auget :-) Jauda, eg veit at det ikkje akkurat er så mykje sol nå, men det har seg slik at akkurat nå er ikkje sy-iveren min kjempehøg. Får eg lyst til å sy ein ting, så syr eg den. Om eg skulle tenkt “nei, nå passar det mykje betre å sy vinterlue”, så er eg redd det ikkje ville bli verken sommar- eller vinterlue.

Prototype: Justérbar hatt! Og den passa til begge jentene, og storebror fekk også (såvidt)til å tre den over hovudet. Patentet funkar!

Prototypen funka så bra at eg sydde ein til, denne gongen med biseband i ytterst i bremmen:

Mønster: Eige str. 51-55
Stoff: Bomullspoplin frå Hilco i begge, i allefall den nederste. Stripete stoff frå Panduro. Ripsband frå Stoff og Stil.

Det snør!

Ullgenser til seksåringen: Denne er sydd av tykk og god sportsull frå Janus (tykk frotté). Applikasjonen er ein test på korleis det er å kutte ut stoff med Silhouette’n. Det gjekk, men ikkje superbra, det var for tynt og kniven tok med seg stoffet litt undervegs. (Eg strauk på Vliesofix bak stoffet, tok av papiret og klistra stoffbiten på kuttematta med limsida ned. Knivdjubda hugsar eg ikkje, måtte prøve meg litt fram, endte eg på 7, tru?)

Mønster: Eige
Stoff: Janus (fargen på det øvste biletet ikkje så aller verst gjengitt). Applikasjonsstoffet er quiltestoff.

Og dessutan: Jenta ønskte seg ein nattkjole, så eg tok samme mønsteret og skrådde ut og forlenga:

22.10.2014

Bursdagsbuksa

(Korleis blei buksa så skeiv på biletet, tru?) Anyway; vi fekk ein aldri så liten change in plans og bursdagsselskapet blei booka om til Leos lekeland. Eg spurte nesten-seksåringen i forrige veke om ho hadde nokon kjole å ha på seg i bursdagen, skulle eg sy ein til henne? -Nei, eg må ha bukse til å leike i, sa ho. Sidan det var bursdagen hennar måtte eg pynte den litt, gjere den litt feminin, tenkte eg. Ikkje sånn retro-velour denne gongen. Delte opp med litt bogar mellom delane, og la inn litt rynking. Godt fornøgd med resultatet! Den grønne blomen er eg redd vil dette av ganske snart, men inntil dét står den der og smiler til oss og dekkjer over at ribben er sydd på bak fram ;-)

Mønster/design: Eige
Stoff: Diverse bomullsvelour. Ribb frå Stoff og Stil.

Luer til jentebursdag igjen!

I hadde vi stor suksess med å ha lue i premie på leikane til alle gjestene i femårsdagen til mellomstejenta vår. Det var stas både for dei og for meg, og ein bonus for meg var at eg, kvar ettermiddag eg henta i barnehagen, kunne sjå kvar jentene i femårsklubben var ute i leikeområdet i barnehagen!

Sidan vi har flytta frå Oslo til Kristiansand sidan forrige bursdag, blei det høve til å sy luer ein gong til, så her er årets samling. Veslesyster på tre held av landsbylua etter å ha fått genser i stoffet samme dag (forrige innlegg), og bursdagsbarnet sjølv la sin elsk lua i det brun-rosa-blomstrete Gekko-stoffet. Bursdagsselskapet var i går, og i dag var det visst fleire luer å sjå i skulegarden i dag, fekk eg høyre. Stas! Så fekk eg vere med på å spre litt farge og varme nokre øyrer ;-)

Her er forresten innlegget frå fjorårets bursdag, om nokon er nysgjerrige.

Mønster: Eige
Stoff: Diverse bomullsjersey

T-skjorter str. 134

Har ein ikkje nok stoff, får ein skøyte på litt… Kva er greitt til ein sju-åtte-åring og kva er for barnsleg? Desse to blei lagt i kleshylla til gutungen medan han var ute i går, eg har ikkje høyrd noko reaksjonar på dei ennå. Var litt i tvil om helikoptera etter å ha klipt dei, men så tenkte eg at fargen ikkje er noko barnsleg, så det fekk våge seg. Astronautane trur eg vil bli godt mottatt fordi han har hatt to t-skjorter av dette stoffet frå før, og den siste av dei brukar han ennå. Tynnslitt og velbrukt t-skjorte.

Eg har forresten byrja å sy stikning på t-skjorte-ermane når eg syr ribbkant som er éin cm brei (to-lags-ribb). Gutungen har nemleg ei slik t-skjorte utan stikning, der ribben konstant er bretta oppover slik av saummonnen blir ein synleg, nedre kant på ermane…

Mønster: Eige; basert på teknikken til Aldrich.
Stoff: Bomullsjersey designa av Johanna Ahlard.

Fleire jersey-genserar

Det lilla stoffet med ugler og diverse på likar eg veldig godt. Faktisk klipte eg ut av mønsteret til “verdifull-jakka” (forrige innlegg) av dette stoffet aller fyrst. Men eg fekk kalde føtter. Rett nok kan eg finne på å gå rundt i diverse litt rare, sjølvkomponerte kreasjonar, men det er grenser for kor mykje merksemd eg likar å tiltrekkje meg, tenkte eg. Så det blei omklipp, og det blei ein genser i str. 122 i staden for :-) (Og eg synest verdifull-jakka blei mykje betre slik den blei!)

Og eit par genserar til veslesyster også:

Genseren med det svenske landsbygs-stoffet blei umiddelbart helsa varmt velkommen av jenta på litt over tre år!

Mønster: Ottobre 1/2013, design nr. 10 (den øverste er gradert opp til str. 122).
Stoff: Singel-jersey: Det øverste er kjøpt av Ixat sin nettbutikk borti Asia den gongen ho (innbillar meg at det er ei dame…) var på Ebay. Landsbygdstoffet er frå Jofotex, og skooterstoffet er kjøpt enten i Sverige eller i Danmark (kan kanskje kjøpast hjå Kreativ i Norge? (pppp.no)).

Nå har mellomstejenta, akkurat fylt 6 år, fått til saman tre slike nokså smale jersey-genserar. Konklusjonen i dag var at ho ønskjer seg fleire :-)

Blomst til ei klassevenninne på 6 år

Denne blei gitt vekk i bursdagsgåve for ikkje så veldig lenge sidan! Designen er eit samarbeidsprosjekt mellom mor og dotter, i praksis eit kompromiss mellom tilgjengeleg stoff/vinyl og design-ønskja til jenta mi. Det er moro at barna engasjerer seg i designen! Her hadde jenta mi, i tillegg fargeønskje for kjolen, ønskje om at dekoren skulle vere ein blomst og forbokstaven til bursdagsbarnet.

Mønster: Eige, str. 6 år
Stoff: Isoli, Jydsk stoflager. Ribb frå Stoff og Stil. Flocked heat transfer fr å Silhouette.

Verdifull-jakke. Verdifull jakke.

Skulle nesten tru at overskrifta høyrer til eit innlegg om orddelingsfeil i det norske språk, hehe! Men om du ser på bileta lenger nede, vil du skjøne kvifor dette er “Verdifull-jakka mi”. Og den kjem til å bli ei verdifull jakke for meg, fordi mønsteret er teikna av ei av yndlingsjakkene mine ;-)

Mønster: Knock-off.
Stoff: Ytterstoff: Lilla singel-jersey i bomull. Krage også av singel-jersey (turkis-prikkete), men den ytterste, lilla stripa er av ribb sidan jersey ikkje er slitesterkt nok for brett. Fôret er bomullsinterlock, eg har aldri heilt likt designet på det stoffet (eitt eller anna med rosa og lilla saman som blir krasj for meg, trur eg…). Men inn mot huden er det deileg, stoffet er mjukt og godt :-) Glidelås frå Stoff og Stil. Vinylen er frå Ebay, eg er redd den kjem til å dette av etter eit par vask,  *iiik*…

Og for å slutte der eg starta: Om du lurar på korleis dei der orddelingsgreiene er, så skal det på norsk ikkje vere mellomrom mellom to ord som uttalast som eitt. Enten skrivast dei i eitt, eller så brukar vi bindestrek. Det var dagens skrivetips. Eller skrive-tips. (Men ikkje skrive tips ;-)

19.10.2014

Tyning av stoffrestar!

Tidlegare har eg samla på velour i ulike fargar, det er moro å kombinere ulike stoff. Då eg byrja å sy i 2009 la eg meg opp eit kjempestofflager, og dette har eg tæra på i over to år nå utan å kjøpe særleg nytt. Men nå går det mot slutten (det er generelt mykje sotff i hyllene ennå volummessig, men det er ikkje så veldig mange store stykke att). Kanskje dette er siste guttegenseren før eg må kjøpe inn nytt. Eg synest den blei veldig fin sjølv om den er laga av restar, så små bitar treng ikkje vere noko hinder for saumen (men det krev litt meir på tankefronten…)

Enten har eg blitt sabla god til å klippe i vinyl til å stryke på, eller så har eg gått til innkjøp av ei kuttemaskin. Og det er det siste som er tilfelle, eg har kjøpt ein Silhouette portrait, kjøpte samtidig eit par rullar flocked vinyl. I skrivande stund er det nesten ein månad sidan eg laga denne genseren, og maskina har ikkje blitt brukt til mykje etterpå. Litt fordi eg har det så trongt på hybelen at eg ikkje har inspirasjon til å dra den fram (når eg er i symodus må eg rydde bort PC’en for å få plass til symaskin). Å kunne ha god plass rundt seg når ein syr er verkeleg eit gode.

Mønster: Eige, str. 134.
Stoff: Diverse. Vinyl (flocked) frå Silhouette/Bikuben. Motivet fann eg på ein blogg eller nettsid som heitte SmartE PartE.

Enkel topp av Symagasinmønsteret

Det blir litt blogging i rykk og napp for tida. For litt sidan trong eg toppar til meg sjølv så eg sydde denne. Det er samtidig ei omforming av omslagstoppmønsteret til vanleg topp med heil framside. Det er ei nokså enkel ombygging når ein brukar versjonen for minste bysta, sidan denne skjerast i rett horisontal linje under bysta. Då blir det som ein heilt vanleg topp, og det er elastisitetet i stoffet som avgjer korleis den blir på større byste. Cap sleeves som eg er glad i (men ikkje så lett å sjå når mønsteret er mønstra…)

Mønster: Eige, publisert i Symagasinet 3/2014.  Str. M.
Stoff: Gekko. Ribb frå Stoff og Stil.

19.09.2014

Pokemon-genser

Siste plagg i kveldens blogg-race: Genser til eldstegut.

Mønster: Eige
Stoff: Tynn isoli, den prikkete frå Hilco, kassettane hugsar eg ikkje, kjøpt i Danmark, tippar eg. Ribb frå Jydsk Stoflager. Vinyl-figuren ikkje akkurat lett å sjå kva er, klipt ut på frihand etter ein silhuett på nett. (Men snart, snart kjem det betre klipte merke, for i går kjøpte eg nemleg ein Silhouette Portrait!)

Smale bukser og vide bukser

Buksa til venstre er sydd av ein litt stiv isoli, litt eksperimentelt, sidan det ikkje finst så mange smale bukser i denne typen stoff (?). Eg har prøvd den på henne då eg hadde den med heim til Kristiansand forrige helg, og den såg grei ut då. (For dei som ikkje las kveldens fyrste innlegg, så er eg for tida vekependlar med hybel-syrom i Oslo…)

Mønster: Det smale er frå Ottobre, faktisk på “tights”, men Ottobre har (tidlegare) hatt ein tendens til å ha veldig vide snitt, så dette her blei bukse. Og treåringen min er ikkje den spinklaste i barnehagegruppa. Mønsteret på den andre er eige, frå den tida då eg teina ein del buksemønster, blant anna frå boka til Helen Armstrong.  Begge str. 98.

Stoff: Buksa til venstre er isoli frå Jydsk stoflager, Ikast, verdt eit besøk på Jyllands-ferieturen. Buksa til høgre restar av velour (all velouren min er av (hovudsakeleg) bomull, forresten). Ribb frå Stoff og Stil (oransje) og Jydsk stoflager (stripete).  Lomma er av velour kanta med FOE.

Truser må ein også ha

Mønster: Teikna av kjøpetruse
Stoff: Diverse restar av bomullsjersey. FOE 5/8” brei, frå Ebay.

Kjekke jersey-genserar

Eg har hittil sydde det aller meste av tøyet til barna (utanom vinterdressar, regntøy o.l.), men siste året har eg kome på etterskot. Mellomstejenta treng genserar, og ho likar tynne jersey-genserar.

Mønster: Ottobre 1/13, design nr 10. Gradert opp frå 116 til 122.
Stoff: Rosaprikkete stoff kjøpt hjå Textart. Dalahest-stoff kjøpt på Jofotex. Stripete stoff frå Hilco, kjøpt frå Sydilla, tru? Ribb frå Stoff og Stil. Det einsfarga stoffet er kjøpt i Sverige.

Related Posts Plugin for WordPress, Blogger...