Siste liten-kostyme

På torsdag var det karneval i barnehagen for dei to eldste barna her i huset, og i dag var det gudsteneste med (frivillig) utkledning for store og små. Så vi kledde oss ut heile familien!

Minstejenta fyrst:


Mellomste-jenta:



Meg sjølv:


Far i huset (Kråkehovudet er sydd av svigermor):



Storebror hadde på seg eit kjøpt kostyme, vi tar med eit bilete likevel:


The making of:


Klovnekostyme, str. ca halvt år:
-Eg klipte ut på gefühl’en slik bileta viser, i god lengde (måling=halde målebandet over jenta medan ho søv…). Framstykke og bakstykke klipt likt (fire lag stoff på bileta):




Framstykket fekk litt djupare utringing i halsen. Glidelås i bogen mellom beina. Ein strimmel blei sydd på i halsen før eg sydde på 5 mm breitt strikk på vranga nokre cm nedanfor kanten. Likeeins sydde eg strikk i handledd og anklar. Eg sydde berre over kantane i hals, armar og bein med overlock, utan å leggje opp (sjå dei øvste bileta.) Stoff: Stoff og Stil.


Bie-kostymet: Kostymet er sydd som ei bukse som er forlenga oppover heilt til oppunder armane, og ein hettegenser som ikkje går heilt med til livet. Følehorn (heiter det dét?) laga av ståltråd-spiral festa på ei hårbøyle.  Stoff: Stripete jersey frå Cetho, svart velour frå Stoff og Stil, brun velour frå Stof2000.


Tre: Sydd av eit gardinpar i breistripa cordfløyel. Etter å ha klipt to like og symmetriske delar, kutta eg ein svak boge til nakke på bakstykket og ein litt djupare ein på framstykket. La opp nederste kant på begge stoffdelar på enklaste vis i nesten heile breidda nederst. Sydde saman dei to stoffstykkene rundt, men utanom nederst, halsen, og opningar for hendene. Sydde på ribb. Eg sette også i tre knappar i den breie opninga nedst, men dei blei ikkje brukt då kostymet var i bruk. Barna var med på lime-på-filtblad-dugnad :). Stoff: Gardinpar frå Kid Interiør. Ribb og filt frå Stoff og Stil.

Heia Sverige!

I Sverige designast det masse tøffe stoff! Fyrst og fremst er det designaren Johanna Ahlard som står for dette. I går var mine to eldste barn på fem og tre år i bursdag til ein liten gut, og med seg hadde dei eit sommarsett. Dét at guten sin pappa er svensk, gjorde det ekstra gøy å brukse svenske stoff (sjølv om eg har ein mistanke om at det stripete stoffet i shortsen eigentleg er finsk…)!

Om mønster/design: For å binde saman shortsen og t-skjorta, tok eg med ei dobbeltbretta stripe jersey i kantebandsapparatet nedst på shortsen, med sjø-stoffet frå t-skjorta (ikkje noko snor inni). Det blei fint, synest eg. Brun kant nedst på t-skjorta var eigentleg ikkje planlagt, men då eg byrja å sy, oppdaga eg at eg hadde klipt oppleggskant på framsida, men ikkje på baksida. Derfor kanting med kantebandsapparat i staden for. Eg brukar som hovudregel ikkje ribb nedst, fordi det så godt som alltid snurpar seg (Kan jo bli ein fin effekt om ein vil ha det). Interlock går likevel greitt utan nemneverdig snurping i mitt uoriginale type A-apparat. Eg hadde ikkje brun bomullsinterlock, så eg har brukt rutete bambus-interlock med vranga ut, der er rutene mindre synlege.

Om nitals-opning-designet: I haust fekk eg forresten registrert designet på “nitals-opning” ved det norske Patentstyret. Det var stas, sidan eg er amatør, og ikkje har noko erfaring med slikt frå før. Tusen takk til dei på Sykroken.net som oppfordra meg til å søkje! I praksis tyder registreringa at retten er min til å bruke dette designet i kommersiell samanheng. For meg er det greitt at hobbysyarar brukar designet til sal i liten skala (på Epla, blogg el.l). Ver i såfall vennleg å referere til min blogg. (Tutorial på mønster-teikning i tutorial-menyen.)

Stoff:

-Jersey med sjømotiv: Znokdesign.se (J. Ahlard)
-Jersey med bylgjer og stjerner: JNYdesign.se
-Ribbkantar: Turkis ribb frå Danmark ein stad, brun ribb frå Stoff og Stil. Brun bambus-interlock til kant frå Myllymuksut.
-Gul/turkis-stripete frotte, frå Myllymuksut.com?

Sommarkjole med berre rette kantar

Alle mønsterdelar er enten rektanglar eller trapes…

Og om stoffa: Eg fekk lyst til å sy i stoff i friske fargar, og tok fram bunken med amerikanske quiltestoff som blei kjøpt inn frå Etsy for to vintrar sidan. Men eg endte opp med Stoff og Stil-stoffa eg kjøpte på salg nå ved nyttår (unntatt skulder-stroppane), og er veldig fornøgd! Eg har som fast prosedyre å kikke innom jersey-hyllene kvar gong eg er på Stoff og Stil, men har visst i litt for stor grad oversett trykt bomull-hyllene, fann eg ut. Der er det mykje fint!

Mønster: Eige

Og plutseleg fekk eg ein ny hobby

Før jol klarte ei venninne å inspirere meg til å lære å hekle! Sjølv om dette er ein syblogg, blei eg så glad over å ha klart å hekle denne hunden, at eg må vise den fram:

Inspirasjon: Eg møtte Lene på ein lunsj for litt sidan, og ho sat og hekla tøffe smokk-haldarar. Og ho lærte meg nokre hekletriks. Tusen takk, Lene! På neste lunsj hadde ei anna venninne med seg ei apekatt-leike som ho hadde hekla etter mønster frå Kaptein eitt-eller-anna, som eg etterpå fann ut at var frå denne bloggen.

Så eg tenkte at eg skulle prøve å hekle litt på måfå og sjå kva det likna på. Og eg hekla i veg, og det såg ut som ei Dachsbikkje-rumpe, og dermed kom idéen til hunden. Eg har forma den til med halvstavar her og der, i tillegg til fastmasker, om det er “lov” med halvstavar i amigurumi, anar eg ikkje. Men det er ikkje så nøye, ho som skal leike med den bryr seg ikkje om slikt :D. Hunden er hekla i eitt frå hale til snute, og så er bein og øyre sydd på etterpå. Rangleboks inni, saman med fyll av polar-fleece (eg som aldri har sydd bamsar eller puter har ikkje fyllvatt liggjande…).

Før eg hekla hunden, hekla eg booties etter dette mønsteret, dama som har laga støvel-mønsteret har lagt ut videotutorialar som var til uvurderleg hjelp for meg. Ved å ha hekla booties på førehand, fekk eg litt innsikt i korleis ein kan hekle tredimensjonale ting, elles hadde nok ikkje denne hunden blitt til så kort tid etter at heklenålene kom i hus!

Og så nokre bilete for bestemødre og andre som måtte ha lyst til å sjå:

Vevd stoff til ei forandring

Eg syr for det meste i strikka stoff til vanleg, men nå fekk eg lyst til å sy noko i vevd (eller vove, som det eigentleg heiter på nynorsk…) stoff. Og då blei denne skjorta til:

Inspirasjon: Mange syr flotte skjorter i retrostil, særleg borte i Sverige. Aller mest blei eg inspirert av retro-stuff, ho syr berre såå mykje stilig!

Mønster: Mønsteret er teikna med utgangspunkt i Aldrich-boka, str. eitt år. Fyrst grunnmønster for overdel, som deretter er gjort om til Kimono-grunnmønster, og igjen endra til raglanermar, før siste finish blei gjort for å gje skjorta sitt særpreg.

Men str. eitt år er den nok ikkje i praksis, den ser ut til å vere aaaltfor stor, hehe. Så vi får sjå når den kan brukast, til neste jo, kanskje? ;-).

Den smale stripa på ermet og knappeklaffane er laga av eit fargesterkt stoff som eg har brukt med vranga som rettside. Det gav ein veldig fin effekt, synest eg.

Stoff og tilbehør:

-Dei to hovudstoffa er frå Stoff og Stil, stoffet med vranga ut er frå Etsy.com. Hjarte-KAM-knappar frå lykkedragen.no. Skråband frå Stoff og Stil.

Fram med dei glade stoffa

Denne tida av året er fin til å finne fram lette stoff med friske fargar, for å glede seg til sommaren. Eg fekk lyst til å prøve meg på å sy pengepungar i friske fargar. Det er mange som syr slike vesker av denne typen i ulike variantar rundt omkring i verda, men eg har særleg latt meg inspirere av fru-jansen, som har sydd nokre flotte nokon innimellom. (Det er også mykja anna flott på bloggen hennar, til dømes syr ho nokre herlege barnekjolar).

Og i skrivande stund ser eg også at Skrekk og Gru også har laga mange tøffe nokon!
Det var artig å sy slike, og det kan godt hende det blir fleire med tid og stunder.
Korleis syr ein så ei slik lita fôra veske/pung/mappe med glidelås? Det finst massevis av tutorialar på dette rundt omkring, ein kan til dømes google “zippered pouch tutorial”, eller “wristlet tutorial”. På youtube finst det forklaringar, til dømes denne: http://www.youtube.com/watch?v=8BrtcXAzeBU. Ein norsk tutorial finst på bloggen til hanne@landet.



Tilfeldigvis passa armbandet akkurat rundt pungen, ikkje så dumt eigentleg, og noko å vurdere også neste gong…
Stoff: Etsy og Stoff og Stil. Dyrestoffet har eg fått i gåve.

Lue og pysj-pose til ein ny verdsborgar

Like før 2011 var ferdig fekk nokre vener av oss ein liten gut. Sidan han arvar mykje tøy, tenkte eg at eg skulle prøve meg på noko anna enn slike klede eg elles brukar å gje til nybakte foreldre. Så det blei ei lue, og i tillegg ein “pysj-pose”, som vi kallar det her i heimen.

Veslejenta vår har brukt slik pose saman med body i staden for pysj sidan ho var nyfødt. Idéen er henta frå andre medlemmer på Sykroken.net (eg hugsar dessverre ikkje kven eg skal gje credit’en til), men det er mogleg at dei igjen har henta idéen frå http://gekko-attsyengecko.blogspot.com/, som lagar slike posar i velour.

Mønster: Eige

Stoff:
Lue: Interlock frå JNYdesign (trur eg), kjøpt hjå Cetho Designs. Fôra med micro-fleece frå Stoff og Stil.
Pose: Interlock frå Cetho Designs, ribb frå Stoff og Stil.

Nerdelue

Eg hadde sylyst, men ikkje inspirasjon. Mannen min gav meg derfor i oppdrag å sy lue til han. Og han fann fort ut at han ønskte seg android på den. “Android??”, spurte eg, “skal du ha bilete av ein smart-telefon på lua?” Men nei, det var visst ein robot-aktig logo det var snakk om, fekk eg snart vite. Den fekk med seg eit rumpeakebrett, sidan lua skulle syast for vintervêret utanfor.

Lua blei sydd, og mannens kollegaer sa det var ei skikkeleg nerdelue. Noko dei alle er veldig fornøgde med. Og dei hadde idéar til endå betre motiv, så får vi sjå om det blir fleire luer, eller om det held med denne eine.

Mønster: Mønsteret er laga utifrå metoden eg har skrive om i dette innlegget. Eg la til éin cm i høgda på mønsteret, dvs. totalt to cm frå øyre til øyre. I breidda trekte eg ifrå oppunder 20%, og det var for mykje, rundt 10% ville nok vore betre. Lua har dobbelt stoff heilt nedst (panneband-forma fôr), elles berre eitt stofflag.

Stoff: Eit tykt, interlock-aktig stoff, dobbeltstrikka med bomull på innsida og ull på utsida. Kjøpt på stofstedet.dk. Applikasjonen er i grønn interlock frå JNY(?) og raud ribb frå Stoff og Stil.

Tunika til å halde varmen i

For ei vekes tid sidan var husets femåring i bursdagsselskap, og med seg hadde han denne tunikaen pakka inn i gåvepapir. Tanken er at tunikaen kan brukast som ein slags vest utanpå ein tynnare genser, eller rett og slett som eit varmande mellomlag under yttertøyet på kalde dagar. Bursdagsbarnets mamma har kome med positive tilbakemeldingar, og det er stas!




Mønster/design: Eige
Stoff: Fleece frå Stoff og Stil, kanta med ribb frå Stoff og Stil. T’en som er applikert på er i vinterfrotté frå Hilco.

Babykjole: Eg er så fornøgd!

Eg har funne ut at eg må sy litt klede til minstejenta, ho brukar str. 68 nå og vi har ikkje særleg med klede i str. 74. Eg klipte fyrst nokre bodyar, men sylysten lot vente på seg. Men så fann eg på at eg skulle sy ein ballongkjole med litt retropreg, etter å ha kjøpt dette prikkete stoffet på salg hjå Stoff og Stil. Og eg blei så glad av å få ferdig denne kjolen at nå har eg lyst til å sy meir! Jippi!

Bisebandsfot var noko av det fyrste eg kjøpte til maskina mi, og brukte den ein del i starten. Men så har eg gløymt det bort litt, men fekk inspirasjon til å take den fram att etter å ha sett bloggen til http://groovybabyandmama.blogspot.com/. Ho er veldig god til å bruke biseband til å lage stilige effektar.  I kjolen her er dei raude stripene biseband. Sydd i babycord med skolisse frå Ica supermarked inni.

Då eg teikna mønsteret tenkte eg at eg skulle ha rynking langs heile skjørtet i livet, men etter å ha sydd dette, angra eg og tok det opp att. Det øydela liksom retro-stilen, syntest eg. Eg testa med større faldar, men då blei det kluss med stoff-fordelinga  for ballongeffekten nedst. Så eg endte opp med å samle”stoffoverskotet” i to buntar med små, små faldar. Godt fornøgd.

Likevel blei det ikkje liknande faldar på baksida, for då var tolmodet mitt slutt, hehe. Så her rynka eg det like mykje overalt:

Som fôr i livet på kjolen er det babycord, medan det er jersey som fôr i skjørtet. Enkelt og greitt; ballongeffekt blei laga ved å strekkje jerseyen då den blei sydd saman med babycorden.

Mønster:
-Sjølvteikna. Denne gongen hadde eg teikna ulike grunnformer frå Aldrich-boka “oppå kvarandre” på samme papir for å få ein feeling med dei ulike grunnformene, i staden for å velge éi grunnform. Og i staden for å bruke måla frå Aldrich, som brukar andre storleiksintervall enn vi er vant til (56, 64, 72, 80), brukte eg mål på str. 74 frå boka “Søm” av Rimor Haugsand (denne boka viser ikkje konstruksjon av barneklede, men inneheld ein svensk måltabell for barnestorleikar).

Stoff:
-Babycord frå Stoff og Stil. Brun jersey frå Cetho Design.

 

 

Dametunika

Litt klede til meg sjølv, for ein gongs skuld! Eg ammar for tida, og tenkte eg skulle lage meg ein tunika som er lett å lyfte opp for amming, med andre ord ein som har litt vidde. Denne er ein slags test av mønsteret eg har teikna.

Veldig enkel modell som er lett å få til å passe, sidan den ikkje tar omsyn til former, den berre heng ned over bryst og mage. Akkurat denne tunikaen er heilt lik framme og bak, bortsett frå sjølve halsutringinga. Det kjem nok til å fungere fint, trur eg, men eg kjem truleg til å justere litt neste gong, slik at øvre del av ryggen blir litt breiare, og samtidig flytte skuldersaumane litt lenger bakover.
Eg diggar “bishop sleeves”, så dét måtte tunikaen ha!
Bak blei rynkinga av velourstoff litt voldsom, synest eg, stoffet står utover (saumbysta er flat i ryggen, så det blir meir uttalt på meg), men dette vil heilt sikkert bli finare om ein syr tunikaen i viscose-jersey.


Halsen er teikna etter instruks i Aldrich-boka på krage som skal henge litt sånn laust og tilfeldig. Den blei ikkje akkurat slik eg tenkte, kanskje fordi stoffet er for tykt, men kragen fungerer uansett fint.

Som eit lite eksperiment, har eg sett på to halve KAM-knappar til å feste eitt eller anna av pynt framme på brystet. Kva det skal bli, veit eg ikkje ennå…
Om mønsteret elles:
-Basert på Basic block for jersey wear (Aldrich)
Grunnmønsteret er omgjort etter liknande prinsipp som for denne tunikaen.
-Armane frå samme grunnform, men omgjort til bishop sleeves ved hjelp av Armstrong si bok.
 -Kragen er teikna etter instruks på “simple cowl collar”, Aldrich side 78.
Stoff og tilbehør:
-Velour frå Stof2000
-Ribb frå Stoff og Stil
-KAM-knappar frå Lykkedragen eller Ebay

Om å lage luemønster

Nå har det vore stille på bloggen ei stund, det har vore lite sying i jola. Men eitt plagg blei sydd like før jol; lue til jolepresang til ein bror. Sidan han er prest, tenkte eg han skulle få ei lue med Ichtys-fisk på, og slik blei den sjåande ut:


Litt av greia med å lage lua, var å lage mønster. Eg laga eit nokså standard (trur eg) grunnmønster reint fasongmessig, men det vanskelege er å vite måla når ein berre har hovudomkrins å gå utifrå. Kor stor omkrins på lua i høve til hovudet, og i høve til stoffval? Og kor stor høgde på lua?
Lua blei bittelitt trang og bittelitt for høg. Eg får sjå om det blir meir luetesting etterkvart, med ulike mål.
Her er tips om du har lyst til å prøve deg fram sjølv på konstruksjon av ei lue som dette (innlegget er revidert i august 2012, etter at ein god del fleire luer er sydd etter denne). 

Kor mykje ein skal leggje til i høgda og breidda vil variere utifrå materiale, og kva for eit design ein ønskjer seg.
 

Tak mål:
Å måle hovudomkrins er nokså greitt, men når ein skal take mål på tvers av hovudet (heretter kalla tverrmål), lønner det seg å markere målepunktet med eit strikk. Set strikket i den høgda på hovudet du vil lua skal nå ned til. Mål frå side til side.

Mønsterteikning:
1. Start med å teikne eit rektangel, delt vertikalt i tre like store delar, dette skal bli mønster på halve lua (lua klippast i eitt stykke mot brett til venstre):

Grunnlinje: Halve hovudomkrinsen minus eller pluss X%.
X: Når ein syr i stoff som vidar seg mykje ut, som til dømes interlock, vil ein gjerne ha lua litt smalare enn hovudomkrinsen, og ein trekkjer ifrå litt på hovudomkrinsen, til dømes 10%. Dersom ein skal sy i eit stoff som ikkje vidar seg så mykje ut, og ein ikkje vil ha lua stram, er det nok lurt å leggje til litt i høve til hovudomkrinsen, kanskje ca 5% vil vere eit passande tal?

Høgde: Halve tverrmålet pluss Y.
Y: Eg synest å hugse at eg la til 2,5 cm på denne lua, og dette blei for mykje. Ca 1 cm er eit betre mål til ei slik lue. Om ein vil ha ein luetopp eit stykke ovanfor issa, kan ein godt leggje til meir, men då må ikkje lua vere for laus nede ved øyrene (med mindre ein skal brette lua opp... Her er det mange design-moglegheiter ;-) Til luer av tynn jersey kan Y også vere lik null.

Teikn inn vertikale hjelpelinjer midt i dei tre rektangla:

2. Teikn inn vinklar på 60° i toppen av kvart rektangel (liggande symmetrisk om hjelpelinjene). Sjå lenger nede korleis du kan lage ein mal i papir, om du ikkje har gradeskive)
3. Venstre side av mønsteret leggast mot brett ved klipping. Høgre side er bak på lua, rund av (grønn strek).

Du kan teikne inn liknande avrunding framme og mellom “fjelltoppane” også, men eg synest det var like greitt å lage avrundingar under syinga, ikkje i klippinga (sjå lenger nede).
Mønsteret kan klippast på ulike måtar. Ein kan til dømes leggje til ein annan form nedst, slik som i lua eg sydde: (grønn strek under vassmerket på biletet):

Ein kan klippe heilt fôr, eller berre eit panneband-fôr. Dersom ein ikkje ønskjer saum nedst på lua, kan ein speglvende mønsteret om grunnlinja og klippe fôr og ytterstoff i eitt.

Sying av taggane: Legg taggane/”fjelltoppane” mot kvarande rette mot rette, og sy “fjellsidene” etter tur, men vent med dei som vender midt for og midt bak (sjå figur under neste figur). Sy til slutt midt for og midt bak. (ulike måtar å gjere dette på, også avhengig av korleis lua er klipt).




Om du ikkje har laga kurve i mønsteret, syr du inn ei kurve på symaskina i etterkant:


Korleis lage ein 60°-vinkel i papir:

Brett eit papir dobbelt. Brett det igjen, slik at du får ei brettelinje som er 90 grader på fyrste brett. Brett tilbake. Teikn eit punkt langs den siste brettelinja, til dømes 4 cm frå kanten. Teikn ein dobbelt så lang strek (altså 8 cm) frå dette punktet til kanten. Medan papiret framleis er bretta, klipper du langs streken, og når du nå brettar ut, har du ein 60°-vinkel. La bretten midt i vinkelen ligge langs hjelpelinja i mønsteret når du teiknar vinkel på mønsteret.

Toppen av lua kan delast inn i færre eller fleire “fjelltoppar”, la summen av vinklane vere 180° pr. halvt mønster.

Om den aktuelle lua: Sydd i interlock med ull på utsida og bomull innerst (Stofstedet.dk), med Teddystoff som panneband utanpå (kjøpt i Lyngdal, Marthas systue). Fisken er sydd med vanleg sikksakk etter stabilisering og merking av stoffet.