Babykjole: Eg er så fornøgd!

Eg har funne ut at eg må sy litt klede til minstejenta, ho brukar str. 68 nå og vi har ikkje særleg med klede i str. 74. Eg klipte fyrst nokre bodyar, men sylysten lot vente på seg. Men så fann eg på at eg skulle sy ein ballongkjole med litt retropreg, etter å ha kjøpt dette prikkete stoffet på salg hjå Stoff og Stil. Og eg blei så glad av å få ferdig denne kjolen at nå har eg lyst til å sy meir! Jippi!

Bisebandsfot var noko av det fyrste eg kjøpte til maskina mi, og brukte den ein del i starten. Men så har eg gløymt det bort litt, men fekk inspirasjon til å take den fram att etter å ha sett bloggen til http://groovybabyandmama.blogspot.com/. Ho er veldig god til å bruke biseband til å lage stilige effektar.  I kjolen her er dei raude stripene biseband. Sydd i babycord med skolisse frå Ica supermarked inni.

Då eg teikna mønsteret tenkte eg at eg skulle ha rynking langs heile skjørtet i livet, men etter å ha sydd dette, angra eg og tok det opp att. Det øydela liksom retro-stilen, syntest eg. Eg testa med større faldar, men då blei det kluss med stoff-fordelinga  for ballongeffekten nedst. Så eg endte opp med å samle”stoffoverskotet” i to buntar med små, små faldar. Godt fornøgd.

Likevel blei det ikkje liknande faldar på baksida, for då var tolmodet mitt slutt, hehe. Så her rynka eg det like mykje overalt:

Som fôr i livet på kjolen er det babycord, medan det er jersey som fôr i skjørtet. Enkelt og greitt; ballongeffekt blei laga ved å strekkje jerseyen då den blei sydd saman med babycorden.

Mønster:
-Sjølvteikna. Denne gongen hadde eg teikna ulike grunnformer frå Aldrich-boka “oppå kvarandre” på samme papir for å få ein feeling med dei ulike grunnformene, i staden for å velge éi grunnform. Og i staden for å bruke måla frå Aldrich, som brukar andre storleiksintervall enn vi er vant til (56, 64, 72, 80), brukte eg mål på str. 74 frå boka “Søm” av Rimor Haugsand (denne boka viser ikkje konstruksjon av barneklede, men inneheld ein svensk måltabell for barnestorleikar).

Stoff:
-Babycord frå Stoff og Stil. Brun jersey frå Cetho Design.

 

 

Dametunika

Litt klede til meg sjølv, for ein gongs skuld! Eg ammar for tida, og tenkte eg skulle lage meg ein tunika som er lett å lyfte opp for amming, med andre ord ein som har litt vidde. Denne er ein slags test av mønsteret eg har teikna.

Veldig enkel modell som er lett å få til å passe, sidan den ikkje tar omsyn til former, den berre heng ned over bryst og mage. Akkurat denne tunikaen er heilt lik framme og bak, bortsett frå sjølve halsutringinga. Det kjem nok til å fungere fint, trur eg, men eg kjem truleg til å justere litt neste gong, slik at øvre del av ryggen blir litt breiare, og samtidig flytte skuldersaumane litt lenger bakover.
Eg diggar “bishop sleeves”, så dét måtte tunikaen ha!
Bak blei rynkinga av velourstoff litt voldsom, synest eg, stoffet står utover (saumbysta er flat i ryggen, så det blir meir uttalt på meg), men dette vil heilt sikkert bli finare om ein syr tunikaen i viscose-jersey.


Halsen er teikna etter instruks i Aldrich-boka på krage som skal henge litt sånn laust og tilfeldig. Den blei ikkje akkurat slik eg tenkte, kanskje fordi stoffet er for tykt, men kragen fungerer uansett fint.

Som eit lite eksperiment, har eg sett på to halve KAM-knappar til å feste eitt eller anna av pynt framme på brystet. Kva det skal bli, veit eg ikkje ennå…
Om mønsteret elles:
-Basert på Basic block for jersey wear (Aldrich)
Grunnmønsteret er omgjort etter liknande prinsipp som for denne tunikaen.
-Armane frå samme grunnform, men omgjort til bishop sleeves ved hjelp av Armstrong si bok.
 -Kragen er teikna etter instruks på “simple cowl collar”, Aldrich side 78.
Stoff og tilbehør:
-Velour frå Stof2000
-Ribb frå Stoff og Stil
-KAM-knappar frå Lykkedragen eller Ebay

Om å lage luemønster

Nå har det vore stille på bloggen ei stund, det har vore lite sying i jola. Men eitt plagg blei sydd like før jol; lue til jolepresang til ein bror. Sidan han er prest, tenkte eg han skulle få ei lue med Ichtys-fisk på, og slik blei den sjåande ut:


Litt av greia med å lage lua, var å lage mønster. Eg laga eit nokså standard (trur eg) grunnmønster reint fasongmessig, men det vanskelege er å vite måla når ein berre har hovudomkrins å gå utifrå. Kor stor omkrins på lua i høve til hovudet, og i høve til stoffval? Og kor stor høgde på lua?
Lua blei bittelitt trang og bittelitt for høg. Eg får sjå om det blir meir luetesting etterkvart, med ulike mål.
Her er tips om du har lyst til å prøve deg fram sjølv på konstruksjon av ei lue som dette (innlegget er revidert i august 2012, etter at ein god del fleire luer er sydd etter denne). 

Kor mykje ein skal leggje til i høgda og breidda vil variere utifrå materiale, og kva for eit design ein ønskjer seg.
 

Tak mål:
Å måle hovudomkrins er nokså greitt, men når ein skal take mål på tvers av hovudet (heretter kalla tverrmål), lønner det seg å markere målepunktet med eit strikk. Set strikket i den høgda på hovudet du vil lua skal nå ned til. Mål frå side til side.

Mønsterteikning:
1. Start med å teikne eit rektangel, delt vertikalt i tre like store delar, dette skal bli mønster på halve lua (lua klippast i eitt stykke mot brett til venstre):

Grunnlinje: Halve hovudomkrinsen minus eller pluss X%.
X: Når ein syr i stoff som vidar seg mykje ut, som til dømes interlock, vil ein gjerne ha lua litt smalare enn hovudomkrinsen, og ein trekkjer ifrå litt på hovudomkrinsen, til dømes 10%. Dersom ein skal sy i eit stoff som ikkje vidar seg så mykje ut, og ein ikkje vil ha lua stram, er det nok lurt å leggje til litt i høve til hovudomkrinsen, kanskje ca 5% vil vere eit passande tal?

Høgde: Halve tverrmålet pluss Y.
Y: Eg synest å hugse at eg la til 2,5 cm på denne lua, og dette blei for mykje. Ca 1 cm er eit betre mål til ei slik lue. Om ein vil ha ein luetopp eit stykke ovanfor issa, kan ein godt leggje til meir, men då må ikkje lua vere for laus nede ved øyrene (med mindre ein skal brette lua opp... Her er det mange design-moglegheiter ;-) Til luer av tynn jersey kan Y også vere lik null.

Teikn inn vertikale hjelpelinjer midt i dei tre rektangla:

2. Teikn inn vinklar på 60° i toppen av kvart rektangel (liggande symmetrisk om hjelpelinjene). Sjå lenger nede korleis du kan lage ein mal i papir, om du ikkje har gradeskive)
3. Venstre side av mønsteret leggast mot brett ved klipping. Høgre side er bak på lua, rund av (grønn strek).

Du kan teikne inn liknande avrunding framme og mellom “fjelltoppane” også, men eg synest det var like greitt å lage avrundingar under syinga, ikkje i klippinga (sjå lenger nede).
Mønsteret kan klippast på ulike måtar. Ein kan til dømes leggje til ein annan form nedst, slik som i lua eg sydde: (grønn strek under vassmerket på biletet):

Ein kan klippe heilt fôr, eller berre eit panneband-fôr. Dersom ein ikkje ønskjer saum nedst på lua, kan ein speglvende mønsteret om grunnlinja og klippe fôr og ytterstoff i eitt.

Sying av taggane: Legg taggane/”fjelltoppane” mot kvarande rette mot rette, og sy “fjellsidene” etter tur, men vent med dei som vender midt for og midt bak (sjå figur under neste figur). Sy til slutt midt for og midt bak. (ulike måtar å gjere dette på, også avhengig av korleis lua er klipt).




Om du ikkje har laga kurve i mønsteret, syr du inn ei kurve på symaskina i etterkant:


Korleis lage ein 60°-vinkel i papir:

Brett eit papir dobbelt. Brett det igjen, slik at du får ei brettelinje som er 90 grader på fyrste brett. Brett tilbake. Teikn eit punkt langs den siste brettelinja, til dømes 4 cm frå kanten. Teikn ein dobbelt så lang strek (altså 8 cm) frå dette punktet til kanten. Medan papiret framleis er bretta, klipper du langs streken, og når du nå brettar ut, har du ein 60°-vinkel. La bretten midt i vinkelen ligge langs hjelpelinja i mønsteret når du teiknar vinkel på mønsteret.

Toppen av lua kan delast inn i færre eller fleire “fjelltoppar”, la summen av vinklane vere 180° pr. halvt mønster.

Om den aktuelle lua: Sydd i interlock med ull på utsida og bomull innerst (Stofstedet.dk), med Teddystoff som panneband utanpå (kjøpt i Lyngdal, Marthas systue). Fisken er sydd med vanleg sikksakk etter stabilisering og merking av stoffet.

Aktivitetsboks for ein treåring

Då eg var liten, hadde eg ei tøydokke med glidelås, knappar og borrelås på, som ein kunne øve seg på. Eit i utgangspunktet fint konsept, men eg hugsar at dokka ikkje engasjerte meg så veldig.  Men eg har fått lyst til å prøve noko liknande, og etter å ha tenkt litt, forsøker eg meg nå på ein “aktivitetsboks”. Så får tida vise om årets jolegåve blir suksess eller fiasko.




Konseptet går ut på at ein lagar mange remser av stoff, som pakkast rundt ein boks av eitt eller anna slag, i dette tilfellet den minste “Skubb”-boksen frå IKEA. Remsene faldast annankvar omkring boksen, lag på lag, og kvart lag har ei eller annan form for lukking som barnet kan leike seg med.
Eg fann fram det eg hadde av “lukke-dingsar” i sysakene mine, og sette i gang. Vil du vere med på ein tur gjennom boksen, så heng deg på! (Trykk på bileta for å gjere dei større.)















Om syinga:
Storleiken på remsene er laga på slump, med breidde frå nokre millimeter til ein centimeter eller to breiare enn boksen, dei smalaste innerst. (Men kvar remse har nokonlunde konstant breidde) Lengdene  på dei er også ulike.

Fyrst sydde eg stoffet saman til ei pølse, pressa, men lukka ikkje remsa i endande. Alle remsene, med unntak av to, blei deretter kutta over omtrent på midten, fordi eg tenkte at det ville bli for tykt under boksen om alle remsene var heile. Før montering, la eg ei heil remse ned, og deretter halve remser annankvar, vinkelrett på kvarandre slik bileta under viser. Nåla og sydde. Eg fordelte remsene på to kryss, som eg sydde saman til eitt tykt eit (det var også så mange lag at det blei litt for tykt å sy alt i ein operasjon).

Etter at krysset var laga, sette eg boksen i. Så jobba eg meg lag for lag utover, ved fyrst å kutte remse-halvdelane til passe lengde, lukke dei i endane (bretta inn og sydde over) og deretter sette på den type lukking som måtte passe. Eg festa boksen til dei to innerste laga med nokre sting til slutt (ikkje med på bileta).

Bukse montert med tape

Ikkje berre tape, altså, men eg har brukt tape i staden for knappenåler før sying :-). Mest for å teste ut ein ny sy-greie kjøpt på Ebay, nemleg “Wonder tape”: Dobbeltsidig tape som forsvinn i vask!. Ein rull med 9 meter kosta oppunder 50 kr inkl. frakt frå USA.

Tipset til tapen fekk eg på ein eller annan strikkeblogg då eg surfa etter tips om glidelåssying. Tapen gjer det lettvint å sy glidelås med fint resultat, ein berre tapar glidelåsen på slik at den ligg støtt under påsying. Veldig greitt! For å teste ut litt meir, kanta eg monstertruck-interlock-stoffet med Coverproen før eg tapa den svarte remsa på nabo-velourstoffet, og sydde saman (vrange mot rette). Ganske tungvinn måte å sy bukse på, fann eg ut.



Buksa er fora med lett ribb med ull.
Mønster:
Teikna med utgangspunkt i “trouser foundation”, str. 6 år. Buksa blei sydd for ei stund sidan, før eg fann ut at eg likar “slack foundation” mykje betre. Denne buksa her blei for djup i skrittsaumen)
Stoff:
-Beige/sandfarga velour frå Stoff og Stil
-Sydilla.no sin interlock med monstertruck
-Blå lett ribb frå Stoff og Stil
-Kanta med svart interlock frå Cetho Designs
-Stripete ribb kjøpt i Danmark

Sommarlege kjolar; tutorial på variantar av A-form-kjole

Desse to kjolane er sydde i relativt tynn jersey, perfekt for varme sommardagar. Men dei funkar sikkert også på litt kaldare dagar, med genser og strømpebukse under. Om du har lyst på nokre tips til korleis du kan variere eit enkelt kjolemønster, kan du lese meir i dette innlegget.

Om mønstera:

Båe kjolane er basert på eit enklet A-form-mønster som har blitt delt i to horisontalt, og der den nedste delen/”skjørtedelen” har blitt gjort vidare enn originalmønsteret. Jerseykjolane har ikkje glidelås eller knepping nokon stad, i motsetnad til ullkjolane som er sydd av samme mønsteret: 
 

Skisse av mønster-utgangspunktet, halvt mønster som klippast mot brett/on a fold (skissa er berre ein illustrasjon, ikkje eit reelt, forminska mønster):

Slik er mønsteret omgjort:

I båe kjolane er det teikna inn eit berestykke, både framme og bak:

Kjole 1 er enklast å lage. Etter at mønsteret er delt i to horisontalt, treng ein ikkje gjere fleire endringar i mønsteret. Ein lagar enkelt til ekstra breidde i skjørtedelen både framme og bak ved å leggje “midt framme”(eller ”midt bak”) på mønsterdelen eit stykke inne på det bretta stoffet før klipping:

Den ekstra breidda ein då får på stoffdelen, tar ein inn att i form av ein eller annan slags type legg (pleats), eller rynking (gathers), før ein monterer berestykke og skjørt saman.

 

Kjole 2 med tredelt skjørt (både framme og bak) har ei lett vifteform på midt-delen, for å gjere skjørtet litt vidare. Mønsteret er delt opp ved den blå linja:

Legg den halve midtdelen på eit nytt papir, rotér utover i øvre “midt framme-punkt” til så vid vifte du ønskjer.

Teikn inn kurve oppe og nede, oransje strekar viser ferdig mønsterdel (halvt mønster, vel å merke)

I tillegg til sjølve mønsterendringane, er det sydd inn ei bretta remse ribb mellom berestykke og skjørt på dette skjørtet, a là biseband/tittekant. Denne ribben blei ikkje strekt nemneverdig under sying.

 

Stoff:

Alle fire jerseyar er frå Cetho Designs, ribb frå Stoff og Stil. Kjole 1 har ein liten bit vevd sommarfuglband festa innunder ribben, frå Leanne.no