Baby Blueprint Crochet

Denne jakka blei ferdig i går, og då den kom på jenta, minte jakka veldig om jakka til ein keisar, hehe… Klede forandrar seg av og til veldig i stilen når dei blir kledd på ein person!

Jakka er nr. to av fire parallelle hekleprosjekt eg har hatt siste månadene, veldig greitt å få den ferdig, for den passar nå framover, str. eitt år, jenta brukar str. 74. Men eg er igrunnen spent på kor mykje vi faktisk kjem til å bruke den, fordi den er hekla i heilt feil garn, og er tykk og stiv i “stoffet”. Men då dette gjekk opp for meg, hadde eg hekla så langt at eg tenkte at eg fekk gjere den ferdig... Garn er ikkje berre berre, har eg skjøna. 




Mønsteret er frå boka


“Baby blueprint crochet. Irresistible projects for little ones” av Robyn Chachula.
Boka har iflg innehaldslista 19 ulike hekleprosjekt for barn frå null til to år. Den er på engelsk med amerikansk heklespråk.


Innehald:
Ermelaus kjole (bilete nedanfor)
Genser med knepping i skulder (google “callum pullover” for bilete)
Jakka eg har hekla
Guttevest (bilete nedanfor)
Lang jentegenser med knepping (bilete)
Ein guttevest til (google “charlie vest” for bilete)
Jentejakke med oldemorruter (google “rosa car coat” for bilete)
Genser med selburosemønster
Tilbehør: Sokkar, slippers, boots, bleiebukse, caps
Til heimen: Vaskeklut, smekke, babyteppe/lappeteppe, elefant-uro, robot-leike, eit babyteppe til.


Oppbygging av eit mønster:
-Info om garntype, heklekrok, tilbehør, heklefastheit, ferdige mål på plagget.
-Skisser over dei ulike delane i plagget, med mål både i inch, cm og mønsterrepetisjonar (sjå bilete nedanfor)
-Mønster på prøvelapp; veldig greitt for å finne ut om ein skjønar mønsteret, kor raskt det er å hekle og slikt. Og sjølvsagt for å finne fram til rette garn og heklenål.
-Sjølve heklemønsteret, plaggdel for plaggdel, med både tekst og symbol (bilete nedanfor)
-Framgansmåte for montering og ferdiggjering av plagget


Kort vurdering av boka:
Boka er veldig grei å fylgje, og forståeleg også for ein fullstendig hekle-nybyrjar som meg. Den brukar både tekst og illustrasjonar/skisser/symbol for å vise korleis ein skal gjere det. Eg som er vant til å sy etter mønster likte veldig godt skissene. Då er det lett å justere når ein ikkje har garn med samme heklefastheit. Eg heklar venstre-hendt, og fekk derfor litt trøbbel med å lese skissene der det var forskjell på høgre og venstre side, men etter litt spekulering, fekk eg det til.

Den store minuset for min del, var at eg valte feil garn. Det skulle ha vore 100% akryl i jakka, og eg valte feil erstatningsgarn, mercerisert bomull (“sport” frå Spar Kjøp). Det passa i heklefastheiten, men blei altfor kompakt. Så då lærte eg ein heil del om garn, for eg går utifrå at jakka ville blitt annleis om ein hadde brukt ull eller akryl. (Men det veit eg jo strengt tatt ikkje, sidan eg har minimal erfaring med garn…)

Alt i alt likar eg denne boka godt, og kan gjerne råde andre til å prøve den. Om dei synest det er greitt med engelsk (amerikansk), vel å merke.

Bilete frå boka: