Akutt behov for noko sukkersøtt

Innimellom alt det retro-aktige, får eg av og til veldig behov for å sy noko sukkersøtt. Og denne gongen blei det eit skjørt til jentungen som fyller fire i haust. Eg er veldig godt fornøgd, og det blei jentungen også (det er berre å seie at ein har sydd eit prinsesse-skjørt, så er det bra med ein gong ;-)

Skjørtet er ca 5 år (4-6). Skjørtet er sydd utelukkande av rektanglar, som eit forsøk. Det blei greitt, men litt tykt i livet, kanskje, når det var så mykje stoff som skulle snurpast.

Snurpinga rundt knappane: Eg tråkla ein ring og snurpa den saman medan eg trykte stoffet bakover (blei ein knopp på baksida). Knaut saman med ein knute, sydde deretter på knapp og sydde samtidig knoppen fastare saman på baksida.

 

Mønster: Eige
Stoff og tilbehør: Bomullsstoff frå Panduro (Tilda), rosa stripete stoff frå Hilco (rest hjå ein tysk tyll-butikk). Knappar for å trekkast med stoff frå Prym.

Bukse med racerbilar

Gutungen på fem og eit halvt plukka på eige initiativ ut dette velour-stoffet og ønskte seg bukse. Og bakpå skulle det vere det der stoffet med romskip på, sa han. Og slik blei buksa (bilete bakfrå):

Mønster: Eige.
Stoff: Velour med racerbilar frå Fabelblå, jersey med astronaut frå Textart. Stripete ribb frå Stof2000.

Onion 2035: T-skjorte

Denne blei sydd for litt sidan. Litt for å teste ut mønsteret for t-skjorte, og litt fordi eg trong t-skjorter. Mønsteret på stoffet er artig, men det er eigentleg ikkje heilt mine fargar.

Mønster: Onion 2035 (kjolemønster)
Stoff: Jersey frå Liandlo? Kjøpt hjå Textart. Designa av Johanna Ahlard, trur eg.

Korleis ein kan opprette faner og sider i Blogger

Etter at eg omorganiserte bloggen min (Blogspot/Blogger), har eg fått spørsmål om korleis eg har fått fram faner på toppen av bloggen. Eg sjølv lurte veldig på dette inntil for ei vekes tid sidan (ikkje korleis eg sjølv gjorde det, altså, men før eg sette i gang, hehe), og kanskje er det fleire enn meg og spørsmålsstillaren som har lurt. Derfor nokre ord om dette:
Innlegg og sider:
Når vi bloggar til vanleg, skriv vi innlegg. Desse kjem i kronologisk rekkjefylgje. Dei kan redigerast i ettertid, og ein kan linke frå det eine til det andre, men dei ligg på sin plass etter den datoen dei blei publiserte.
Men så har ein i tillegg moglegheit til å leggje inn "sider"/"pages". På bloggen min står det ikkje kor mange, men ein stad på nettet stod det at ein kan opprette 10 sider. Kva er så ei side? Ei side liknar på eit innlegg, men ligg utanfor den kronologiske rekkjefylgja av innlegg, og er derfor ikkje datert. Av denne grunn passar sidene godt til å skrive generell informasjon, organisere bloggen o.l.
Faner:I min blogg representerer alle fanene øvst slike sider. Når ein er inne på sida, ser ein at det er ei side ved at det står "/p/" etter "...blogspot.no".
Det som er greia med fanene, er at når ein opprettar sider, vil Blogger automatisk leggje dei inn i Bloggen enten som faner på tvers eller som ei liste nedover i sidekolonne. Dette kan ein velje inne i menyen "utforming".
Slik kan du lage sider (NB, eg brukar det nye Blogger-grensesnittet):
-Gå inn på "utforming" øvst i høgre hjørne på bloggen din
-I menyen til venstre vel du "Sider"
-Velg "Ny side">"tom side"

Denne sida kjem opp, og ser nesten heilt lik ut som ei side der ein skriv vanleg innlegg:

Før du skriv, bør du bestemme deg for om du vil lage innlegget i Blogger, eller om du vil lage det i Windows Live Writer (det er dei einaste moglegheitane eg veit om, kan godt hende det finst 1000 til...). Sjå lenger nede om WLW.
NB: Om print screen-bileta mine stemmer med fyrstegongs oppretting av side, hugsar eg ikkje heilt. Men eg hugsar at menylinja kom opp omtrent veldig tidleg i prosessen etter at eg hadde byrja å opprette sider.
Inne på "sider-sida" kan ein velje om linkar til sidene skal kome opp som faner, sidekoblingar/liste eller om ein vil leggje dei inn manuelt:

Sjå på bloggen din kvar dei havnar, og om du vil endre plass, går du inn på (frå bloggens hovudside) "Utforming", vidare i menyen til venstre: "utforming" ein gong til, så plasserer du med samme metode som du elles er vant til.
Når ein er innelogga på bloggen, og er inne på sjølve bloggen ("vis blogg"), kjem det fram eit verktøy-symbol på kvar gadget, i allefall gjer det det i Opera og Chrome. Om ein redigerer sidene med dette verktøyet, kan ein krysse av kva for sider som skal vere synlege. (Dette kunne eg tidlegare gjere også inne i "Utforming" på brukarpanelet, men den funksjonen har forsvunne av ein eller annan grunn… Begge stader kan ein i allefall klikke og dra for å bytte plass på linkane til sidene. Aller fyrst kom opp ei fane der det stod "Start", det gjer det på min pr. i dag også. Denne fana viser berre til bloggadressa di, dvs. til toppen av bloggen. Du kan sjølv skrive inn ein annan tekst, til dømes "til toppen", "heim", eller liknande, resultatet blir det samme.
Ein kan jo velgje mellom mange forskjellige maler for bloggen, og eg har testa ut korleis dei malene som ligg inne i Blogger-panelet fungerer på bloggen min. Fanene får ulik design utifrå malen, og det er litt forskjellig kor mange faner i breidda ein kan ha med dei ulike malene (Nokon maler gir to rader med faner under kvarandre.)
Det er vel stort sett det ein treng å vite for å opprette sider i Blogger, trur eg.

Men litt om det med å redigere sidene i WLW:
Blogger er tungvint å redigere bilete o.l. i, veit eg det er mange fleire enn meg som synst. Det går ikkje an å publisere frå Windows Live Writer (WLW) direkte til sider i Blogger pr i dag, så vidt eg har forstått. Men det går an å gjere det indirekte, ved å lage eit blogginnlegg som vanleg i WLW, og sende det til bloggen som ein kladd/utkast. Deretter kan ein opprette ei side, trykkje på redigere i html. Samtidig gå inn på utkastet i Blogger i ei anna fane/vindauge i nettlesaren, velje å redigere html. Merke teksten i utkastet, og kopiere html-koden derifrå og inn i sida. Når ein så publiserer, kjem sida automatisk opp som ei fane, evt. på liste. Om ein så vil endre, kan ein endre teksten i WLW og sende det det som kladd til bloggen på nytt, ny runde med copy+paste (stryke den gamle html-teksten).

Å teikne med tråd

Eg likar godt strekteikningar! Og det er igrunnen ikkje så vanskeleg å lage strekteikningar på tøy, det vanskelegaste er sjølve teikninga, –ikkje syinga.

Strekteikningar med symaskin:

Utstyr og materiale:
-Symaskin med rettsaum
-stabilt stoff/lite elastisk
-tykk sytråd
-viktig: nål med stort auge, dvs. topstitch- eller broderinål. Eg har brukt desse.
-matpapir, eller anna papir som kan både teiknast på og rivast nokså lett

Eg teiknar ei strekteikning på matpapir. Eg prøvar å teikne lengst mogleg utan å lyfte blyanten, slik at eg kan sy tilsvarande lenge utan å avbryte saumen. Deretter nålar eg papiret godt fast, og syr langs streken. Eg festar ikkje tråden med fram- og tilbake-sting i starten og slutten, for det blir lett synleg. I stadenfor festar eg trådane for hand. (Derfor lengst mogleg samanhengande saum ;-). Eller eg lar streken byrje i saummonnen, slik strekane på ørnebuksa er starta og slutta. Når eg er ferdig med å sy, riv eg papiret vekk. Ferdig! NB: Eg “teiknar” på stoffet før eg monterer plagget! Og: Ikkje sy for langt før du sjekkar undersida av stoffet, det kan vere at du må justere trådspenninga på overtråden ein del.

Av og til har eg berre sydd på måfå, utan å teikna på førehand. Alt etter kva for ein stil eg har vore ute etter. Eller snarare kanskje mangel på stil, hehe, vegen blir til medan ein går :-)

 

Strekteikningar for hand med ullgarn:

Utstyr og materiale:
-Garn som er såpass tykt at det synst godt, men så tynt at det både går greitt gjennom nålauget, og gjennom stoffet. NB: garnet må tåle vask slik ferdig plagg skal gjere.
-Nål med stort nok nålauge (her har eg brukt spiss stoppenål)
-Vanleg synål, helst litt lang
-Vanleg sytråd i samme farge som ullgarnet.

Fyrst lagar eg skisse på stoffet (og sidan det er for hand, går det gjerne bra om plagget er ferdigmontert.) Eg tråklar teikninga på med lange tråklesting, med vanleg synål og sytråd. Kortare sting i svingane. Eg synest det er betre å sy på mange korte tråkletrådar (til dømes 10 cm lange), enn å sy heile teikninga med éin tråkletråd. Då er det nemleg lettare å take opp att og tråkle på nytt der eg ikkje synest streken kom på rett plass. Eg justerer teikninga til eg er fornøgd, og så er det klart for sjølve syinga med garn.

Broderinga med garn gjer eg med “splitta kontursting” (jfr. boka “Søm-abc i syteknikker”). Det vil seie: Stikk nåla frå vranga til retta. Sy eitt sting fram/ned att til vranga, her har eg vel latt dette stinget vere, tja, 10-12 mm, kanskje. Gå tilbake eit halvt sting, og stikknåla opp gjennom tråden på oversida (splitte stinget). Sy eit heilt sting fram, over siste halvpart av forrige sting. Tilbake eit halvt, opp gjennom stinget, osv. Til slutt drar eg ut tråkletrådane, evt. lar dei stå att om dei ikkje synst.

Å pynte med snor

Å sy på ei snor er veldig dekorativt, synest eg. Som kantstein mellom asfalt og grasplen, liksom. Og så kan ein lage strek-teikningar med snor. Eller pynte på andre måtar, berre fantasien set grenser, eignetleg. Eg likar godt å sy på anorakk-snor, men den er såpass tykk, at det blir trøblete å sy den på  med vanleg syfot. Men det finst mange syføttar som er laga for slikt. Til Pfaffen min har eg fleire, og eg har ein til overlocken også.

Frå venstre på biletet:Perlefot (Pfaff) for store perler
Snorfot (Pfaff)
7/9-holsfot (Pfaff)
Perlefot (Huskylock)


Snorer eg har brukt:
-Tykk, lilla anorakksnor frå Stof2000, tykkare enn den tykkaste til Stoff og Stil. Går i begge perleføttene, men får ikkje plass i snorfoten.
-Naturkvit anorakksnor frå Stoff og Stil, tynnaste typen av dei to dei har. Passar fint i snorfoten.
-Moulinégarn: Passar fint i 7/9-holsfoten, men blir fort litt tynt om ein vil ha eit dekkande skikt av fleire trådar.
Her har eg prøvd meg:

Her har eg brukt perlefoten til venstre på bileta over. Snora er sydd på med vanleg sikksakk.

	Her har eg brukt snorfoten, den andre frå venstre på bileta. Sikksakk.
	Huskylockens perlefot (tretråds overlock-saum)
	Huskylockens perlefot (tretråds overlock-saum) Perlesnora er kjøpt hjå Panduro.no

7/9:holsfot: Denne prøvde eg med fleire moulinétrådar parallelt, og sydde i svingar. Blei ikkje bra, det sklei hit og dit. Ville kanskje blitt OK om saumen var rett og ikkje svingete?
Fleire døme på å pynte med snor:

Bein på ein fugl… (Frå kjole i dette innlegget)

Her har eg sydd på moulinégarn i spiralen, eg trur ikkje eg brukte spesialfot for snor her, men heller open applikasjonsfot. Håret er også moulinégarn, som eg krølla saman litt og sydde over fram og tilbake, gjentok dette mange gonger. Fleire bilete her.

Her har eg sydd på moulinégarn med sikksakk for å gje ein pyntekant (frå denne kjolen)

Snor kan bli stilken på ein blom… (Frå denne buksa)

KAM

Sidan eg omorganiserer bloggen litt for tida, kjem det nokre “basic-innlegg”, dvs., eg har ikkje sydd noko nytt eg vil vise fram,  men skriv om eitt eller anna tema som eg synest er interessant innanfor saum. Fyrste innlegget er om KAM-knappar.
Eg diggar KAM-knappar! Og då er det knappane av plast eg snakkar om, eg har ikkje prøvd metallknappane. Les meir om KAM-knappar her.

Mange fordelar, dei eg likar best er:-masse glade fargar
-sit godt fast i tøyet
-kan brukast som dekor på tøy
-garantert nikkelfrie

Nokre ulemper også:
-Knappen er tykk
-Av og til er dei harde å få opp, og kan dra nokon stoff heilt ut av form når ein skal opne knappen, om ein ikkje stabiliserer stoffet før isetjing av knapp.



Nokon har ei stor knappe-presse til å setje i knappar med, hittil har eg greidd med med knappetang. Eg har den nyaste versjonen, som det står “HG” på. Og så er det forresten berre str. 20-knappar eg har brukt.
Trykk-knappar veit folk kva er til, så det eg heller tenkte å vise, er nokre bilete der eg har brukt KAM-knappane til pynt. Det vil seie at eg set på ein halv knapp. Ein heil knapp består av cap+socket og cap+stud. Sidan socket-delen har buttare kantar enn stud’en, brukar eg socket bak cap’en når eg berre set på ein halv knapp.

Pynt på ein genser

Hjarteforma knappar

På barnekjolar

På pengepung

På ei fargerik bukse

Som auger på ein blomst på ein kjole

På dongeribukse

Kjøpe KAM-knappar:
-Lykkedragen
-Ebay (søk på “KAM snaps”, evt. “KAM plier” (knappetang)
-kamsnaps.com

Onion 2035: Blomster-tunika

Det var så moro å sy kjole av Onion 2035-mønsteret, at eg har sydd meg ein tunika også! Inspirasjon til denne fekk eg via Gekko sin Pinterest-tavle, der ho hadde pinna tunikaen som dama bak "Skapat av mig" hadde laga. Sistnemnte skreiv at det var greitt å ha dobbelt stoff i bystedelen, og då tenkte eg med ein gong at eg skulle prøve dobbelt stoff med forskjellige stoff i dei to laga.

 

Om mønsteret: Bortsett frå at lengda på skjørtet er forkorta, er bakstykka like som på "Regnvêrskjolen", skjørtet er altså delt bak vertikalt. Eg gløymde å klippe ekstra lengde på bystedelen, men sydde med så lite saummonn som mogleg, så nokre få millimeter ekstra blei det nok. Ermane er den vide varianten, sjølv om dei ikkje er så vide som eg trudde. Igrunnen akkurat passe. Eg trudde dei var for korte og la til 1 cm på lengda, men dette blei 1-2 cm for langt. Kanskje fint slik dei er nå, hengande litt nede på handa, men litt irriterande, eg blir gåande og heise ermane heile tida, liksom. Den opprinnelege halsutringinga ligg ein stad mellom dei to her. Det vil seie at eg har gjort halsutringina litt smalare i nakken også.

Sying av halsen: Dei to berestykka er klipt likt, bortsett frå halsutringinga. Ved klipping laga eg eit hakk i skuldersaummonnen på det rosa stoffet der blomsterstoffet slutta. Fyrst kanta eg det ytterste stoffet. Deretter tråkla eg dei to stoffa saman i skuldersaummonnane (rette mot vrange). Sydde så høgre  skuldersaumen (rette mot rette med bakstykket). Kanta deretter den innerste halsutringinga heilt rundt, sydde venstre skuldersaum og sydde tunikaen vidare som vanleg.

Neste Onion 2035: Ryggen passar ikkje heilt til min rygg, det ser ein på dei skrå rynkene i korsryggen. Det vil altså seie at stoffstykket er litt for langt i diagonal retning, mellom øverst midt bak og nederst i sida. Skal lure på om det blir betre om eg kuttar litt skrått nedover på toppen av mønstert til skjørtedelen, frå sida mot midten? Veit ikkje heilt korleis dette blir med den vertikale saumen. Det er nå vel berre å klippe og sy og prøve :-) Kanskje nokon har gode tips?

Mønster: Onion 2035

Stoff: Mønstra jersey frå Gekko. Einsfarga jerseyar frå??, hugsar eg ikkje. Ribb frå Stoff og Stil.

Onion 2035: Regnvêrskjole

Nå har eg sydd min fyrste 2035-kjole, etter det populære mønsteret Onion 2035! Og som fleire har sagt før meg: Dette mønsteret kjem eg til å sy av igjen (i skrivande stund har eg akkurat avslutta klippinga av ein topp etter mønsteret).

Fargane kjem dessverre ikkje fram godt nok, berestykket på kjolen er i ein intens, djup turkisfarge, men kameraet vil ha det til å bli enten blått eller “vanleg turkis”. Eg har stilt og stilt på kameraet, men ingenting funkar. I allefall, sånn cirka slik ser kjolen ut:

Blåfargen i kjolen er også ein flott, djup nyanse. Under er det eit bilete av dekoren på brystet. Det pøsregnte då eg sydde kjolen, og dekoren blei inspirert av dét, hehe ;-)

Skyene er ein lapp av frotté-stoff med skyer på, paraplyane kjem frå eit tynt interlock-stoff med trykte paraplyar på, og regndråpane var eg glad for å finne i pyntesaumutvalet på symaskina mi. Rundt lappen er det sydd på anorakksnor.

Endringar på mønsteret:

Mønsteret er kjent for at den horisontale saumen under bysta kjem for høgt opp, så eg forlenga berestykket bittelitt, 6-7 mm, (bortsett frå i sidene), sjølv om eg ikkje er spesielt barmfager av meg. Omtrent slik endra eg berestykket:

Det nedre bakstykket er heilt, utan innsnitt, og vil garantert lage tverrgåande faldar over rumpa på meg, sidan eg har ein del svai i ryggen. Eg delte derfor bakstykket, tok vekk bittelitt frå midten heilt øverst, og la til litt mot midt bak på største delar av skjørtet. Litt faldar fekk eg likevel, men mykje mindre enn det ville blitt.

Det eg skulle endra på, men oppdaga fyrst då kjolen var sydd, var at underermane var akkurat litt for tronge. Eg får bruke kjolen litt og sjå om dei er brukande likevel, elles får eg sy dei om på noko vis. Lengda på ermane er eg ikkje heilt sikker på om stemmer med mønsteret eller ei.

Mønster: Onion 2035

Stoff: Blå og turkis velour frå Jydsk stofflager. Sky-frotté frå JNYDesign (Cetho). Paraplystoffet er kjøpt frå USA eller Sør-Korea, enten Etsy eller Ebay. Naturkvit anorakksnor frå Atoff og Stil (den smalaste typen deira).

Satengbluse: Skikkeleg utfordring…

Pjuhhh… Godt å bli ferdig med denne blusa, å sy i sateng er skikkeleg vanskeleg. Og den krøllar seg berre ein ser på den!! Beklager at eg ikkje tok meg tid til å stryke den før fotografering, eg var berre så veldig klar for å bli ferdig med den.

Dette er del 1 i mitt prosjekt med å sy finklede til meg sjølv av nokre stoff eg fann på Stoffshop.dk i Århus.

Om designet:

Det var eigentleg meininga å sy ein topp med brei, ståande krage i halsutringinga, etter å ha googla “satin top” og blitt inspirert av denne. Men min krage blei ikkje jevnt avrunda, det blei knekk-danningar her og der, så eg droppa heile kragen. I staden for blei det sydd på to breie “skjerf” som kan bindast opp til ei sløyfe.

Om mønsteret:

Ei venninne hadde eit eldre Alt om Håndarbeide-blad, der det var mønster på ein heilt enkel, ermelaus topp i fast stoff, med innsnitt i sida. Relativt tettsitjande modell, knappestolpe midt framme. Eg endra mønsteret slik:

Eg fann ut at innsnittet på mønsteret traff litt nedanfor og utanfor mitt brystpunkt, så eg teikna av eit nytt punkt bittelitt lenger opp og inn frå der innsnittet slutta. Teikna så ei linje derifrå og opp i halsutringinga, der eg ville at hovedfolden skulle gå. Klipte langs streken, opna opp så mykje at det gamle innsnittet blei lukka. Klipte opp ei linje nedanfor skuldra også, til ein mindre fold. Opna opp. La nytt mønsterpapir over og teikna inn det nye mønsteret. Det er belegning langs halsutringinga og armane, belegninga er uendra frå det opprinnelege mønsteret.

I staden for knappestolpe framme, la eg inn knepping i venstre skulder og glidelås i venstre side. Og eg fekk endeleg prøvd meg på å trekkje knappar sjølv, etter at knappane for trekking har lege urørt i eit par-tre år…

Sidan det ikkje funka med kragen slik eg hadde tenkt, prøva eg på litt forskjellige løysingar med kanting av halsutringinga, men utan at eg fekk det til særleg bra. Så til slutt sydde eg to “skjerf” som kan knytast på forskjellige måtar, og det blei fint, synest.eg.

Så er eg litt spent på kor mykje eg kjem til å bruke toppen. Eg er verken vant til å sy eller gå med tøy av sateng. Men eg får berre prøve :-)